Pro 4 | ZomZIV | STEP | Ka tapate aw, pate lamlahna ngai unla, thusimin theihtelna ngah un.

Proverbs 4

Pilna mah Thupipen

1 Ka tapate aw, pate lamlahna ngai unla,
thusimin theihtelna ngah un. ^a
2 Sinna picing kong pia hi;
kong hilhna nawlkhin kei un.
3 Ka nu ta neihsunin ka pa inn ah
naupang moi-a ka om lai-in
4 amah in, “Na lungsim neih zahin ka thute lenkip inla, ^b
ka thupiakte zui lecin na nungta ding hi. ^c
5 Pilna ngahin theihtelna ngah in; ^d
ka thugente mangngilh kei inla, pialkhiatsan kei in.
6 Pilna pialsan kei lecin ama’n hong dal dinga,
amah it lecin ama’n nang hong cing ding hi. ^e
7 Pilna thupipen ahi manin pilna zong in.
Na neih khempeuh ^{▼▼4.7 Ahikeh na ngah peuhmah} na bei lawh zongin theihtelna zong in. ^g
8 Pilna thupisak in, nang hong tawisang ding hi;
amah pom in, nang hong pahtawi ding hi. ^h
9 Na lutang ah kilawmna pakkhi hong khimsak dinga,
a thupi kumpi lukhu hong khusak ding hi,” hong ci hi.
10 Ka tapa aw, ngai-in ka thugen sang in; ⁱ
na khan sawt ding hi. ^j
11 Na pil nading lammaan ah kong pi a,
lamtang kong zuisak hi. ^k
12 Na pai ciangin na kalsuanna hong dal om lo ding hi.
na tai ciangin na kimuktu kei ding hi. ^l
13 Lamlahna lenkip inla khahsuah kei in;
na nuntak nading ahi manin limtakin cing in. ^m
14 Migilote’ lampi tawn kei inla,
mikheltatte’ lampi zui kei in. ⁿ
15 Tua lampi pel inla, tawn kei in;
tua pan kiheikhia inla, nang lampi ah pai in.
16 Migilote a sia khat a bawl mateng ihmu thei lo uh a, ^o
mi khatpeuh a puksak matengun a ihsip kei uh hi.
17 Amaute in gitlohna annekin nei uh a,
ngongtatna zudawnin a nei uh hi. ^p
18 Thumaan mite’ lampi ahileh ni suak tung nizang banga, ^q
sun nitang a bat dong a tangpha semsem hi. ^r
19 Ahi hangin migilote’ lampi khuamial thukpi banga;
amau in a muktusak a thei kei uh hi.
20 Ka tapa aw, ka thugen thusim inla, ^s
ka kammalte limtakin ngai in.
21 Mitkhah loin en gige inla
na lung sungah kem in;
22 a mute adingin tuate nuntakna hi-a,
mihing khat pumpi bup adingin damna ahi hi. ^t
23 Lungtang in nuntakna nak ahi manin ^u
na khempeuh sangin lim kep zaw in. ^v
24 Na kam panin thukawi paukhia kei inla;
na muk panin kam hoih lo pau kei in.
25 Na mailam tangtakin en inla ^w
na mailam mah mitsuan gige in.
26 Na zuih lampi maihtam ^{▼▼4.26 Ahikeh Ngaihsun} inla, ^y
a kipte bek tawn in.
27 Taklam le veilam ah pial kei inla, ^z
gitlohna lampi tawn kei in.